ఏపీ హైకోర్టు ఇచ్చిన తీర్పుపై నిమ్మగడ్డ రమేష్‌కుమార్ స్పందించారు. హైకోర్టు సూచనలతో తిరిగి విధుల్లో చేరతానని.. తన విధుల్ని నిష్పక్షపాతంగా నిర్వహించాను అన్నారు. అన్ని పార్టీలతో సంప్రదింపులు జరిపిన తర్వాత స్థానిక సంస్థల ఎన్నికల ప్రక్రియను ప్రారంభిస్తానని.. వ్యక్తులు శాశ్వతం కాదు.. రాజ్యాంగ వ్యవస్థలే శాశ్వతం అని వ్యాఖ్యానించారు. రాజ్యాంగాన్ని పరిరక్షిస్తానని ప్రమాణం చేసి వారంతా రాజ్యాంగ విలువలు, సమగ్రతను కాపాడాలన్నారు.ఏపీ మాజీ ఎస్ఈసీ నిమ్మగడ్డ రమేష్‌కుమార్‌ పిటిషన్‌పై ఏపీ హైకోర్టు సంచలన తీర్పు ఇచ్చింది. ఆయన్ను ఎస్‌ఈసీగా కొనసాగించాలని ఆదేశించింది. ఏపీ ప్రభుత్వం జారీ చేసిన జీవోలన్నీ రద్దు చేసిన రాష్ట్ర అత్యున్నత న్యాయస్థానం.. రమేష్‌ కుమార్‌ను రాష్ట్ర ఎన్నికల కమిషనర్‌గా తిరిగి నియమించాలని ఆదేశాలు జారీ చేసింది. ఎస్‌ఈసీ విషయంలో నిబంధనలు మారుస్తూ తెచ్చిన ఆర్డినెన్స్‌ను ధర్మాసనం కొట్టివేసింది. ఆర్టికల్‌ 213 ప్రకారం ప్రస్తుత పరిస్థితుల్లో ఆర్డినెన్స్‌ ఇచ్చే అధికారం రాష్ట్ర ప్రభుత్వానికి లేదని హైకోర్టు స్పష్టం చేసింది. హైకోర్టు తీర్పుతో నిమ్మగడ్డ రమేష్ మళ్లీ ఎస్‌ఈసీగా బాధ్యతలు చేపట్టొచ్చని లాయర్లు చెబుతున్నారు.